“Bu fürsət əlimə düşəndə çox sevindim. Çünki “Neftçi” çox yaxşı komandadır. Bu komandaya qoşulduğuma görə çox şadam və uğurları üçün əlimdən gələnin ən yaxşısını edəcəyəm".
"Report"un məlumatına görə, bu fikirləri "Neftçi"nin yeni transferi Yusuf Laval klubun televiziyasına müsahibəsində deyib.
22 yaşlı nigeriyalı vinger pandemiya səbəbindən hazırlıq prosesinin çox çətin olduğunu və evdən çıxıb heç nə edə bilmədiyini söyləyib.
Laval ev şəraitində bəzi təmrinləri yerinə yetirməyə səy göstərdiyini sözlərinə əlavə edib: "Fiziki formamı qorumaq üçün artıq bir aydan sonra meydançada məşq etməyə çalışırdım. “Neftçi” fanatlarını internet vasitəsilə izləmişəm. Bilirəm ki, bu komandanın çox gözəl azarkeşləri var. Onlarla görüşü səbirsizliklə gözləyirəm. “Neftçi”də əsas məqsədim ən yaxşı oyunçu olmaqdır”.
Qeyd edək ki, "Neftçi" Yusuf Lavalla 2+1 illik müqavilə imzalayıb.
