UEFA Avropa Liqasının qrup mərhələsində II tura start verilib. "Report"un məlumatına görə, ilk olaraq, 6 qrupda 12 görüş keçirilib.
"Qarabağ"ın yer aldığı I qrupunda "Sivasspor" Türkiyədə İsrailin "Makkabi" (Təl-Əviv) komandası ilə üz-üzə gəlib. Görüş qonaqların qələbəsi ilə yekunlaşıb - 2:1. Hesabı 55-ci dəqiqədə meydan sahiblərindən Olarenvaju Kayode açıb. Lakin 65-ci dəqiqədə Samba Kamara penaltiyə səbəb olub və komandasını azlıqda qoyub. Dan Biton isə penaltini dəqiq yerinə yetirərək, hesabı bərabərləşdirib. Son nöqtəni isə 75-ci dəqiqədə Dor Perets qoyub.
Qrupun digər oyununda "Qarabağ" İspaniya "Vilyarreal"ına 1:3 hesabı ilə uduzub.
Bu nəticələrdən sonra "Vilyarreal" və "Makkabi" hərəyə 6 xalla liderliyini davam etdirib. Xalsız "Sivasspor" və "Qarabağ" isə 3-4-cü yerləri bölüşür.
