Azərbaycanda hərbi xidmətə çağırışla əlaqədar hərbi qeydiyyat qaydalarının pozulması ilə bağlı qanunvericiliyə dəyişiklik ediləcək. Milli Məclisdən APA-ya verilən məlumata görə, bu məqsədlə İnzibati Xətalar Məcəlləsinin 350-ci və 354-cü maddələrinə əlavə və dəyişikliklər təklif olunur.
Layihəyə əsasən ilkin hərbi qeydiyyata alınmalı olan vətəndaşların qeydiyyata alınmaq üçün fərdi çağırış vərəqəsində göstərilmiş müddətdə üzürlü səbəblər olmadan müvafiq icra hakimiyyəti orqanına gəlməməsinə görə xəbərdarlıq və ya 30 manat miqdarında cərimə tətbiq edilir. Hazırda isə bu cərimə 3 manatdan 5 manata qədərdir.
Həmçinin çağırışçıların və hərbi vəzifəlilərin hərbi qeydiyyatını aparan orqanın vəzifəli şəxsi tərəfindən çağırışçılardan və hərbi vəzifəlilərdən “Hərbi vəzifə və hərbi xidmət haqqında” qanunda nəzərdə tutulmayan əlavə sənədlərin tələb edilməsinə, hərbi qeydiyyata alınma haqqında vəsiqəyə yanlış məlumatların daxil edilməsinə, onların hərbi qeydiyyata alınmasından, hərbi qeydiyyatdan çıxarılmasından və ya hərbi qeydiyyata alınma haqqında vəsiqənin verilməsindən əsassız imtina edilməsinə görə 300 manat miqdarında cərimə tətbiq olunacaq.
Eyni zamanda “Hərbi vəzifə və hərbi xidmət haqqında” qanunda nəzərdə tutulmuş vəzifələri icra etməməyə görə də cərimələr nəzərdə tutulur. Belə ki, hərbi vəzifəlilər ehtiyata keçirildikdən sonra 7 gün müddətində yaşayış yeri üzrə hərbi qeydiyyata alınmaq üçün müvafiq icra hakimiyyəti orqanına gəlmədikdə, hərbi vəzifəlilər və çağırışçılar yaşayış yerini 3 aydan çox müddətə dəyişdirdikdə, yaşayış yeri üzrə hərbi qeydiyyatdan çıxmadıqda və olduğu yer üzrə hərbi qeydiyyata durmadıqda, hərbi vəzifəlilər və çağırışçılar yaşayış yerini dəyişərkən 10 gün müddətində hərbi qeydiyyatda olduqları müvafiq icra hakimiyyəti orqanına məlumat vermədikdə onlara xəbərdarlıq edilir və ya 30 manat miqdarında cərimələnirlər.
Layihəyə görə, hərbi vəzifəlilərin və çağırışçıların Azərbaycan Respublikası qanunvericiliyi ilə müəyyən edilmiş hərbi uçot qaydalarını pozmasına, habelə çağırış üzrə hərbi komissarlığa üzrlü səbəblər olmadan gəlməməsinə və ya hərbi uçotda durduğu uçot orqanına yaşayış yerinin ünvanının, təhsilinin, iş yerinin və vəzifəsinin dəyişməsi haqqında məlumatları vaxtında bildirməməsinə görə xəbərdarlıq edilir və ya 15 manatdan 20 manatadək miqdarda cərimə tətbiq olunur.
Layihə Milli Məclisin müzakirəsinə təqdim edilib.
