Tahir Gözəl: “Qarabağ”ın bəxti gətirmədi”

İdman

Tahir Gözəl: “Qarabağ”ın bəxti gətirmədi”

03.08.2016 - 02:03

Qarabağ”ın vitse-prezidenti Tahir Gözəl Çempionlar Liqasının III təsnifat mərhələsinin cavab oyununda “Viktoriya” ilə 1:1 bərabər qaldıqları görüşdən danışıb.

Qol.az-ın məlumatına görə, T. Gözəl oyundan sonra jurnalistlərə verdiyi açıqlamada mərhələ adlaya bilmədikləri üçün məyus olduqlarını vurğulayıb: “Nəticəyə görə məyusuq. Oyun ərzində üstünlük bizim tərəfimizdə idi. 90 dəqiqə boyunca 3 real qol epizodunu boşa verdik. Amma rəqibin 1 imkanı oldu, onu da dəyərləndirdilər. Xalqımızı qələbə ilə sevindirməyi çox istəsək də, alınmadı”.

Tahir Gözəl qarşıdakı hədəflərinin Avroliqanın qrupunda oynamaq olduğunu qeyd edib: “Qarabağ” əlindən gələni etdi. Lakin mərhələ adlamaq mümkün olmadı. Bununla belə, mübarizə davam edir. Sona qədər mübarizə aparacağıq”.

O, möhtəşəm azarkeş dəstəyindən də söz açıb: “Biz Qurban Qurbanovun işinə qarışa bilmərik. Bundan sonra danışmaq asandır. Unutmayaq ki, diqqət yetirməli olduğumuz məqamlar var. “Viktoriya” rəhbərliyi ilə söhbətimiz oldu. Bu komanda paytaxtı təmsil etməsə də, hər oyunda stadionda 12 min azarkeş olur. “Qarabağ”ın hər oyununa 12 min azarkeş yığsaq, bu, bizim üçün uğur olar. Azərbaycan xalqına təşəkkür edirəm. Bu gün fanatlar komandaya möhtəşəm dəstək verdilər”.

“Qarabağ”ın vitse-prezidenti klubun trasfer siyasətinə də toxunub: “Sponsorlar hər zaman Qurban Qurbanova deyirlər ki, yol açıqdır. Heyəti gücləndirmək yolunda daim çalışırıq. Amma oyunçu almaqla qrupa düşmək təmin olunmur. Bu gün oyunumuz çox gözəl idi. Bəxtimiz gətirmədi”.