"Hər Səhər Əkbərlə" verlişi maraqlı qonaqları və əyləncələri ilə ekranlara rəng qatmağa davam edir. Proqramın bu günki qonağı sevilən sənətçi Arzu Rzayev olub. Özü kimi adı da maraqlı olan müğənniyə ilk sual elə adı ilə bağlı olub. A.Rzayev adının həyatına bir başa təsir etdiyini deyib: "Adımı həyatımda yaşayıram. Nə arzulamışamsa, hamısına çatmışam. İstədiyimi əldə edən insanam".
Efirlərdə az-az görünən sənətçi dostlarından da bəhs edib: "Dostlarım çoxdur. Amma arada naxələflik də görürəm. Sonra düşünürəm və heç kimi qınamıram. Ola bilər iş çoxluğundan başları qarışır. Ümumiyyətlə elə insanam ki, pislik görəndə də, yaxşılıqla cavab verirəm. Çünki həyat bumeranqdır".
Həyatda onun üçün ən insani keyfiyyətlərin daha üstün olduğunu qeyd edən sənətçi, avtomobillərə marağından da bəhs edib: "Qeyri-adi avtomobillərə sahibəm. Avtomobilləri çox sevirəm. Hətta müğənni olmasaydım, avtomobil mühəndisi olardım. 1941-ci ilə məxsus "Vilis"im var. Bu avtomobil Milli Qəhrəman Həzi Aslanovla bağlı filmdə çəkilib".
Müğənni Almaz Ələsgərova ilə sevgili olduqları iddiasına hər iki tərəf açıqlama verib. Hətta Almaz Ələsgərova telefonla canlı yayına bağlanaraq bunun əsassız olduğunu bildirib: "Arzu ilə sevgili olmamışıq. Bir vaxtlar duet oxuyurduq. Söz-söhbət həmin duetdən qaynaqlandı. Biz çox möhkəm dostuq. Mahnını daha canlı etmək üçün baxışlar olub, amma bu dostluqdan başqa mərhələyə keçməyib". Arzu Rzayev isə bildirib ki, Almaz xanımın nişanlısı həmin klipdə kadr arxasında əyləşib.
Sonda sənətçinin gənclik şəkilləri göstərilib. Səsləndirilən ritmik mahnıya isə dözməyən Əkbər gözəl rəqsi ilə proqramı sonlandırıb.
Cia.az
