“Regionların sosial-iqtisadi inkişafı dövlət proqramı çərçivəsində 642 yeni və əsaslı təmir olunmuş səhiyyə müəssisəsi tikilib istifadəyə verilib”.
Səhiyyə Nazirliyinin mətbuat xidmətindən APA-ya verilən xəbərə görə, bunu nazir Oqtay Şirəliyev Nazirlikdə “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunmuş toplantıda deyib.
Nazir bildirib ki, həyata keçirilən tədbirlər sırasında yoluxucu xəstəliklərlə, epidemiyalarla mübarizə sahəsində atılmış addımların xüsusi əhəmiyyəti var: “Kütləvi peyvəndləmə, həyata keçirilən tədbirlər hesabına qonşu ölkələrdə qeydə alınan yoluxucu xəstəliklər, epidemiyalar Azərbaycandan yan keçir. Hazırda ölkədə uşaq əhalisinin 93-97%-i dövlət səviyyəsində həyata keçirilən 11 peyvəndlə əhatə edilib”.
O. Şirəliyev qeyd edib ki, dövlət tərəfindən bir sıra istiqamətlərdə səhiyyə üzrə dövlət proqramları qəbul edilib: “Bu proqramlar ilk növbədə insanlar üçün həyati təhlükə yaradan sahələrdə icra edilib. O cümlədən, xroniki böyrək çatışmazlığı sahəsində əhaliyə xidmət etmək üçün 26-sı regionlarda yerləşən, 34 dializ mərkəzi istifadəyə verilib. Məlum olduğu kimi, 245 min şəkərli diabetdən əziyyət çəkən insan dövlət tərəfindən zəruri dərman vasitələri və nəzarət aparatları ilə təmin edilir”.


